خدنا إجازة.. هييييييييه

غادة محمد محمود

من زماااااااان قوي، لما كنّا صغيّرين ومتشرّدين، رُكَبْنَا مليانة ميكروكروم وسنّتْنَا القدامانية واقعة، ماكانش فيه غير إجازة واحدة مُعترَف بيها عِيَالِيًّا (الإجازة الكبيرة)، واللي كانت بتبدأ أول ما ننزل من آخر لجنة في السنة، والتي غالبا ما تكون في فصل تانية أوَّل أو أيّ حاجة أوَّل (ماعرفش ليه).

ومن زمان قوي برضه كنا نقطّع ورقة آخر امتحان ونعملها عصافير نرميها في الهوا ونردّد في سيمفونية نشاز مرحة "لا مُذَاكْرَة بعد اليوم. لعب الكورة أهمّ أهمّ." وهذا الشعار اتفق عليه الولاد والبنات بالرغم من إن اهتمامات معظم البنات في هذه السنّ بالكورة لا تتعدى اهتمامات حضرتك بدراسة اللغة السنسكريتية.

لكن لما عجلة الزمان دارت (كح كح، اشندني يا ابني) اختلف مفهوم الإجازة كلّيّاً وجزئيا عندنا، وبدأنا نفكر في حاجة تانية غير الكورة نقضي بيها وقتنا ونقعد نعمل خطط ومشاريع وأحلام عريضة، أيْ نعم ما بتتحقَّقْش، لكن برضه بنحطّها في دماغنا، وكل واحد بيقول في سره "الوقت مش لازم يطير زيّ إجازة السنة اللي فاتت".

قبل ما نبدأ في التفاصيل ونفتح علب الألوان، فكرنا نطلّ بسرعة علي باقة الأفكار أو البدايات اللي اختارناها لكم للإجازة، نتمنّى تفتح نفـْسُكم، وتشوقكم للتفاصيل.

1. البداية من جوّه

مكان أيّ بداية دايماً بيكون من جوّاك، من نَفسك، بنحتاج لترتيب الأوراق القديمة، محاسبة النفس، لومها ومكافأتها وإعطائها فرصا جديدة، تقييم اللّي حصل والتخطيط للّي جاى، بالظبط زىّ الشجر لما بيتخلص من الورق القديم علشان يخضرّ ويزهّر من تاني.

تجاهُل الخطوة دي، بيضع على نفوسنا أعباء وضيقا مابنعرفش مصدره، أقل مشكلة بتفقدنا تركيزنا وقدرتنا علي المواصلة.

مفيش طريقة أو وقت ثابت لعمل ده، الأنسب إنك تعمل ده باستمرار وبشكل تلقائي، لكن في النهاية إنت الأقدر علي تحديد الوقت والمكان المناسبين لحوار حقيقي مع نفسك والتفكير في بدايات جديدة .

2. 100% مكسب

إجازة يعني وقت ومساحة فاضية لمشاريع واستثمارات تفيدك علي المدى الطويل، إضافة مهارات وخبرات جديدة، أو تنمية مهارات موجودة عندك بالفعل، لازم يكون على قائمة أولوياتك في الإجازة.

الخيارات والطرق كتيرة، والموضوع بيتوقف على اللي انت بتحبّه أو متوقع استفادة منه. طبعاً القراءة حلّ ممتاز، لكن لو الموضوع جديد أو صعب عليك، فالاشتراك في دورات دراسية بيكون الحلّ المنطقي، ومهما كان الوقت والفلوس اللي هتضحي بيهم، فتأكد إنك 100% كسبان .

3. بالهنا والشفا

باعتبارها حاجة بنعملها كل يوم، فالأكل والشرب من أكتر العادات اللي مش بس بتأثر في صحتنا سلباً وإيجاباً، دي كمان بتأثر في مزاجنا وقدرتنا علي التركيز. أجسامنا ليها مطالب ثابتة من مواد غذائية أساسية، فيتامينات وسعرات حرارية وغيرها، تجاهُل المطالب دي والتعامل معاها بشكل عشوائي بيكون ليه ردود فعل كلنا تقريباً بنعاني منها.

المتخصصون بيقولوا إن المسألة مش صعبة، وإن تبنّي عادات غذائية تضيف لحياتنا موضوع مش مكلف ولا مستحيل. لـَو الموضوع يهمّك، فالإجازة فرصة لتصليح علاقتك بجسمك، والتحول لبني آدم طبيعي بياكل ويشرب عشان يعيش، مش العكس.

4. مفهوم جديد للمتعة

(قضّيها، أيّ حاجة، مش فارقة...) وكلمات تانية كتير استعمالها كان كفيل بإفساد كام إجازة ف حياتك، الفكرة إن مفيش أيّ تعارض بين الاستمتاع بوقت فراغك والإضافة لنفسك من خلال ده. الاهتمام بحاجات جديدة في الدنيا والنظر ليها بشكل مختلف هو البداية.

الحياة مليانة هوايات وأماكن ومواضيع وأفكار، كل علاقتك بيها إنك بتسمع عنها. متتكسفش تجرب، تسأل، تروح، تحاول. الأكيد إنك هتكتشف وتتعلم حاجات جديدة، وإنك برضه هتستمتع، لأنه فعلاً مفيش تعارض..

5. هوب..هوب!!

مفيش شك إننا بنعيش في رفاهية أكتر من ناس كتير سبقونا، المواصلات ونظام الحياة اللي بيوفّر عليك الحركة لأسباب كتيرة. الحقيقة إن ده بيزيد يوم عن يوم، والرصيف المتحرّك مبقاش خيال علمي.

وكان نتيجة لكده... شباب بكروش، وآلام في الضَّهْر، وأمراض كلها ليها علاقة بقِلّة الحركة وعدم ممارسة نشاط. يمكن الظروف أحياناً مابتمنحناش الوقت الكافي لممارسة الرياضة، حتي في أبسط صورها، لكن في الإجازة مالكش حجّة، والمجال مفتوح لتعويض اللي فات، المشي وتمارين السويدي هيّ أضعف الإيمان، وباقي الخيارات بترجع لظروفك ومزاجك، بس اعمل حاجة.

6. روح جديدة للأماكن..

حيطة أُوضتك خلاص زهقت من لونها، والمكتب هاين عليه يتحرك لمكان جديد... الأماكن اللي بنعيش فيها بتشبهلنا، وبنظرة سريعة عليها تقدر تعرف إنت قد إيه محتاج تجديد، وتجديد الأماكن بيكون دايماً جزء أساسي من تجديدنا إحنا.

الموضوع مش مكلّف زىّ ما انتَ فاكر، وحاجات كتيرة تقدر تعملها بإيدك، إضافات بسيطة بتضيف روح جديدة للأماكن، وليك طبعاً.

7. الناس، الناس

ومين يقدر يعيش لوحدُه؟ ومين هيلاقي كل الناس بتفهمه وتعامله بالطريقة اللي هوّ عايزها وبس؟ مفيش طبعاً، لكن تفضل علاقاتنا الاجتماعية بكل مستوياتها محتاجة لتجديد ومرونة وتفـًهُّم وتركيز. المبادرة هيّ مفتاح التجديد، والناس بتستنى الاهتمام منّك حتى لو كان الدور عليهم لعمل ده.

مع الوقت تقدر تكتسب مهارة المبادرة بدون تكلّف أو مبالغة، وردود الفعل هتكون مدهشة وجميلة في أحيان كتيرة. في الإجازة المجال أوسع للتواصل مع الناس وتقوية أو إعادة بناء جسور معاهم.

8. اخرج برّاك شوية

مهما كانت خبراتك أو مهاراتك أو طاقتك، هيفضل عندك اللي ممكن تقدّمه للناس، للمجموع اللّي انت جزء منه، اللّي بتأثر فيك مشاكله مهما تجنّبتها، وبتستفيد من تقـَدُّمُه مهما كنت مقصّر.

افتقادنا لقيمة العطاء للآخرين، هو مشكلة حقيقية، وجزء غير أصيل من ثقافتنا، بيدعمه اعتقاد ناس كتيرة إن التطوع مجرَّد فعل ذي اتجاه واحد مفيش عائد منه، وهو اعتقاد خاطئ، غير إنه أناني طبعاً.

توجد منظمات ومؤسسات تقدر تمارس التطوع من خلالها بشكل مُنَظَّم وتتعلم منه كتير، بس إنت تقدر تعمل ده بنفسك أو مع أصحابك بأبسط الأفكار وأقل التكاليف، وثِقْ إن أفعال صغيرة بتعمل تغييرات كبيرة، وابدأ بنفسك .